خواطر عشوائية

للمحامية بيسان سويد

شو حلوة الرجولة والنخوة والشهامة ……
شو حلو لما حدا يقلك انا حدك ما تخاف …..
شو حلوة القوة لبتمد ايدها بوقت الضعف لتقويك …….
وشو حلو السند وقت ما بتلاقي حدا …….
وشو حلو كل واحد يعرف حدوده وما يتعدى اللياقة والاحترام وما يعلمنا دروس بالحياة لأنه الحياة كفت وفت …..
بالمقابل …….
شو صعب تلاقي اشخاص بيسمعوا لبدن ياه وبطنشوا على لبدن ياه وبيهربوا ………
شو صعب الإستغلال ومعاملة البشر متل السلع لالها سعر معين …..
شو بشع البخل بالكلمات والمشاعر والأحاسيس والعطاء …..
وشو صعبة المساومة بعز ضيقتك ……
والاسوء منن اصحاب المصالح لبس تنتهي مصلحتن كلمة شكرا بتصير غالية …….
شو صعبة صلة الرحم لما تصير تسيطر عليها الماديات والانانية ….
شو بشعة الأخوة لبتتنكر بتوب الغربة عند اول منعطف طريق ……
شو بشعة الصداقة لبتبلش انا حدك وبتنتهي بعد فترة لاسباب مجهولة …..
شو حقير لبيبني علاقاته على عطور الاجساد وبيتعرى من الاخلاق والمبادىء ……
وشو بشعة الغريزة الجنسية لما تصير المحرك الرئيسي للعلاقات وتنعدم الارادة .
شو صعب النكران بعد العطاء من القلب وشو صعبة طعنة القريب قبل الغريب …….
وشو بوجع التمييز وتغير السلوكيات بعد طوارىء الحياة والتنمر والتعالي من ناس للاسف بيشبهوا كل شي الا البشر ..
وبالختام شو صعبة الحياة بمجتمع مريض مزيف مزروع بكل انواع الشر والنكران والخيانة والغدر .
( خواطر عشوائية عامة ، على فكرة القوي هو لبيحكي بجرأة مش لبمثل وبضل لابس اقنعة مزيفة )