صباح الخير يا كفركلا

محمد برو 

كيفك شو أخبارك؟ موجوعة؟ اليوم الأحد والطقس حلو والمفترض أهلك والبيارتة يكونو زايرينك وفي عجقة من الضهور للمصلبيّة. ليش ساكتة؟ احكيلك شي خبريّة. كيفها الساحة وعين شوّاق والحسينيّة؟ كيفها طريق البيضا والوادي والمصلبية؟ والعويدة والنبعة والحارة الشمالية؟ كيفها الحريقة والضهور والنوريّة؟ كيفو تل نحاس والحمى والبوابة وهورة؟ يا ويلي عليكي هلقد متضايقة ومقهورة؟ احكيلك شي كلمة بتضلها بيني وبينك مستورة. كيفها الحارة القديمة والجامع والبيوت القديمة؟ يا ويلي هالظروف شو اجت عليكي لئيمة. كلنا هجرناكي وتركناكي وحدك يا مسكينة. كيفو ترابك والمسيل والجلالي وشجر الزيتون؟ عبالي إفتل فيكي من عند الحج العبد للزيّون. أبصر شعورك هلق كيف بيكون ! لك ليش ساكتة؟ احكي. قومي من فرشتك قومي من تحت الردم. قومي اوقفي واطلعي من هالعتم. قومي انطرينا رح نرجعلك وننتصر عالظلم. رح نرجعلك وترجع العجقات. وتنتلي الساحات. ويفتحو الدكاكين والمحلات. حتى الشهداء لي ضحّو كرمالك وكرمالنا، رح يفرحو مطرح ما هني، وينبسطو انو لولاهن هني، ما رجعنا على بيوتنا، وعمّرنا بيوتنا، ورجعتلنا الحياة كِلّا.

صباح الخير يا كفركلا محمد برو