خضر حيدر
عميسألوني: ليش مستحلي؟
يمكن جهل
أو ذوقهن غفلان
يمكن عمى ألوان
أو فكَّرو لون القمر كحلي…
عميحسدو ع جسمك الفستان
والزر والعروي
وبيسألو القهوي اللي بالفنجان
كيف شافها حلوي؟
ما صدَّقو إنّو الشمس
بتدبّل عيون النعس ..تا تقشعِك
إنّو القمر حب السهر
منشان يبقى هالعمر..كلّو معِك
إنّو جمالك عالصبح متل البلح
لوَّح على النخلي…
لا تسألي قديش في عندن كلام
حروف متل حجار فوق حجار
حروف متل الميّ بتسرّب قوام
حروف متل النار عمتغلي…
مَيّة كلامن دلدقِت
غِيري وتقاويل ومقت
مَلِّي…
وصبِّي حروف بالسَّلِّي!