قدرات الانسان ووجوده٠٠

بقلم الاعلامية باتريسيا سماحة

اليوم بدي احكي عن موضوع شوي اشكالي وهو انو الانسان يكون واعي لقدراتو لمواهبو لشكلو ولوجودو

ويكون بقدر مين هو ..وكيف السنين والتجارب نحتتو لصار الشخص يلي هو اليوم

في كتير ناس بتحط حالها بوهم كبير وبتصير عايشة ع اساس هي هيك …كيف الهر يلي بشوف حالو اسد بالمراية ويمكن مرايتو بتكون المحيطين فيه او عقلو يلي مصورلو شي بعيد عن الواقع او حتى السوشيال ميديا يلي هي الاخطر اليوم …وفي بالعكس اشخاص بكونو بالحقيقة اسود وبالمراية بيعطو لحالن حجم اقل بكتير …والاتنين بنفس الخطورة

ومن هون فينا نروح على موضوع الغيرة …ما فيك تغار من شخص ما فيك تكون متلو مش لانك مش طموح بس لانو عندو قدرات ومواهب انت ما عندك ياها
قد ما شديت وقديت ما بتظبط واكيد اذا بتركز على قدراتك بتلاقي انو عندك شي تاني تعملو بغير مطرح ويمكن يحجزلك مكان لتنجح وتتميز بالقدرات والمواهب يلي عندك ياها
الفكرة انو يحقق كل شخص وجودو من خلال هو مين وشو قادر يعمل
والشرقطة ما فيك تكتسبها يا بتكون منك وفيك يا هي مش موجودة

وصباح الخير 🌸