…… ممنون يا صاحبي …..

بقلم الشاعرة ديدي

أنا إختارتك يا صاحبي
علشان تكون صديقي
بقى سكنك جوة قلبي
وبقيت سندي في طريقي
عشرة سنين طويلة
إخلاص و وفاء حقيقي
………………………………
فاكرها من البداية
من و إحنا صغيرين
ياما إتخانقنا كتير
ومشينا متخاصمين
وتاني يوم تجيني
و قوام نقوم ضاحكين
……………………………….
عمر الزمان ما فكر
يبعد بينك و بيني
بتحس باللي فيا
يادوب بنظرة عيني
باحميك و أرد غيبتك
و بتعادي إللي يعاديني
مسنود عليك يا صاحبي
و وجودك بيواسيني
تلاقيني في وقت ضيقة
و في ضيقتي بتعديني
……………………………….
ماحدش مننا إختار أمه وأبوه
ولا اختار الشقيق
بنقابل ناس كتير
و منهم تلقى نفسك
بتختار الصديق
تلاقيه شبهك كدة
شهم بحق وحقيق
تفكيره زي فكرك
وكتير من روحه فيك
تحكيله .. و يحكي ليك
و يحس باللي بيك
تلاقيه بيخاف عليك
يديك رأيه بصراحة
مش زيف عشان يرضيك
……………………………….
يبقى بينكم عيش و ملح
و إرتباط سنين طويلة
تقولك انت إختارت صح
و إن عشرتكم أصيلة
تدوم يا صاحبي
وتعيش غي قلبي
و تعيشلي صحبتنا الجميلة