بيروت، بتبقي الفرحة…

زياد سامي عيتاني

• 

ما بيلبقلك إلا الفرحة،
يا عروس لابسة طرحة،
ولعرسك أحلى سهرة،
مع زفة وزقفة ورقصة،
بيروت، بتبقي الفرحة..

---

عروس وعاملة غُرة،
وعشعرها مَعلقة زهرة،
شو بيلبقلك تتغندري،
و عل كل تتغنجي،
يّلي جمالك فرجة،
بينعملك طنة ورنة
وكرمالك، الكل بغني،
بيروت، بتبقي الفرحة..

---

يا إسوارة من دهب،
حاولوا حرقها بالنار واللهب،
يا عقد من ريحان وياسمين،
تاج مكلل ع الجبين،
العشاق والحالمين،
على مدى الشهور و السنين،
ولأبد الابدين،
بيروت، بتيقى الفرحة..

---

يا غَزاة العين،
عليك يا نور العين،
محمية برموش العين،
أنت يا كحل العين،
يلّلي بتسوي دموع العين،
بيروت، بتبقي الفرحة..

---

بحرك أزرق متل عيونك،
واسع وبساع همومك،
كل موجة بتحمل بشرى،
والبشرى بتتفتح زهرة،
زهرة، بتتعلق خرزة زرقا،
بيروت، بتبقي الفرحة..

---

أرضك خضرا، وبضلها خضرا،
رغم الغيمة السودا،
إلّلي جايي من برا،
غيمة وبتزول،
مهما الوقت يطول،
وبترجع بتزهر لِحْقول،
وبفوح زهر الليمون،
بيخضر غصن الزيتون،
بيروت، بتيقي فرحة..

---

قرميد بيوتك،
أحمر متل الخجل ع خدودك،
مسيجة بالزنبأ والفل،
نضيفة مهفهفة متل الفل،
إيوانها بساع الكل،
فاتح بابو للضيف يهل،
بيروت، بتبقي الفرحة..

---

بجنينة البيت، وبِفَيِت الجميز
قبضايات لابسين “خنبيز”،
قعدة أركيلة بتهدي البال،
مع فنجان قهوة بحب الهال،
ذكريات وحكايات،
وخبريات ما بتخطر عالبال،
بيروت، بتبقي الفرحة..

---

ما تخلي الفرحة تصير ترحة،
ما تخلي قلبك يتحول صحرا،
خليك أنت الزهرة،
خليك للشرق أحلى درة،
وخليك النغمة رقصة،
بيروت، تبقى الفرحة..

---

حبك ما بيخلص، لا اليوم ولا بكرا،
ولا بغيب عن البال لحظة،
بضلك أحلى فكرة لليوم ولبكرا،
حبك، مش لح يتحول لذكرى،
بيروت، بتبقي الفرحة..
عروس، ولابسة الطرحة…

---

بيروت: ٤ آب ٢٠٢١