اليوم ذكرى استشهادك، ريتها السما تعطيك تترضيك. صوتك عالي، صوتك واضح. انتم السابقون و نحن اللاحقون.

كتبت الفنانة التشكيلية الفلسطينية سهاد الخطيب:

شاءت الظروف أن ابعث لوالدتك لوحتك هذا العيد يا نزار. طلبتني في التلفون هديك اليوم لتأكدلي انه لوحتي وصلتها. حكينا لأول مره. قلبها لسه محروق عليك بعد تلت سنين. لسه تعذيبك بذاكرتها. اكتر شي كل ليلة بس يجي موعد النوم. حكتلي قديش بتلاقيك حلو من و انت صغير، هيه اكيد بتلاقيك احلى من ما رسمتك باللوحه، بس مع هيك دعتلي كتير من فرحتها فيها.

اول مرة بعرف انك اول مرة انحبست كانت هون في الأردن و انت بصف تاسع. من وقتها و انت جاهز تدفع ثمن قول الحق. اول مرة بعرف انك كنت التالت عالمملكة بالتوجيهي و مع هيك بعد التخرج رميت الشهادة و اصريت ترجع عفلسطين. بالأردن انت الفلسطيني، و بفلسطين انت الأردني. متلي. قالتلي انك اشتغلت نجار عشان ما عمرك تضعف امام عروض المؤسسات المجتمعية العميلة.

استفسرت مني الوالدة ليش رسمتك من أول سؤال: انتي يعني بتعرفيه لنزار من الجامعة؟
قلتلها: لا، أنا و نزار عمرنا ما التقينا بهاي الدنيا. بس الإيمان اننا نلتقي في العالم الآخر.

اليوم ذكرى استشهادك، ريتها السما تعطيك تترضيك. صوتك عالي، صوتك واضح. انتم السابقون و نحن اللاحقون.
والله على كل شيءٍ شهيد.
.
لوحتي/دراستي: نزار بنات
اللوحة رُسمت في العام ٢٠٢٢