رسالتي لكل امرأة قوية

ريف سليمان

شو حلوة هل مَرا !! سبحان اللي خلقلها هل عيون ، مع انهم عسليات ع بني ومش ملونين بس شرحتهم بتجنن ماشالله!
بس تطّلع بوجا و تفاصيله ما فيك تشيل عينك عنه، وجها مدور ابيض و سنانا صف واحد و ضحكتا ولا أهضم و كلها عيون…

البنت معلمة و مثقفة كتير ، اذا بتقعد معها بتعرف تحكي و ما بتحكي الا حكم يعني عندا مضمون مش فارغة و اسلوبها راقي ، وذكية كتير مش هبلة و قريبة للقلب و بتحسا هيك صادقة …
حبيت فيها انه مش مايعة وبتعرف تتصرف و تفرض نفسا،
حنونة كتير، من قلبا بتعطي وقت وحب، وكريمة النفس …
يعني البنت شبعانة و ما في بعينا ، مش مادية ابدا او مصلحجية ولا نكدة و للأمانة ما بتنق ولا متطلبة و مش دراما كوين بالعكس فرحة و مرحة و بتحب الحياة و بتوزع طاقة إيجابية…

البنت شغيلة و متواضعة و مسؤولة مش اتكالية و عندا من نفسا كتير و بتمد إيدا لكل حدا بحاجة لدعم و عندا رحمة كتير ع الناس و ما بتكسر بخاطر حدا، بتساعد كتير …ما بعرف قديش هيي مرتاحة لهلقد بتساعد غريب! انه من وين المصاري غريب! مع أنه بنت عيلة و مش اي عيلة يعني….يا سيدي الله يرزقها …

× طيب وين المشكلة فيها؟ ما فهمت؟

يا خيي البنت ما فيها مشكلة بس بخاف منها، يعني البنت ذكية و مصحصحة بتسأل كتير و بتستفسر ما بيقطع عليها شي!
يعني بتحب التفاصيل كتير و ما فيك تستهبلا والمصيبة انه قوية!

×كيف يعني قوية! واذا قوية عن حق وين المشكلة!

خيي ايه قوية و ايه عن حق… بس قوتا بتخليها مش خاضعة، يعني بدا مجهود ل تقنعا ، ما فيك تفرض عليها فرض او تسكتا هيك… بدك تحاورها و تناقشا و انا ع حالي ما بقى الي خلق!
فيها مواصفات صارت نادرة هل ايام صراحة بس للأمانة يا انا مش عارف شو بدي ، يا انا ما الي جلد بقى و صار بدي كل شي هين، يا انا تعودت سكّت المرا بالمصاري و الهدايا …
هيدي ولا هدية ولا شي بسكتا مع أنه للأمانة حنونة و بتحب من قلبا و فيها خير ، وبتلاقيها بآخرتك او وقت تضيق الدني فيك،
و عندي يقين انها إخت الرجال بس يا خيي ما بعرف!

× بتعجبك ولا كيف! شكلك مش مقتنع فيها يعني بين ايه و لا!

بتعجبني كتير و عندي عاطفة اتجاها، يعني في كمستري ،
المرا بتفوت ع اي قلب و اي مطرح بتعلم ، عندا حضورها يعني ما بتقطع مرور الكرام! بس للأمانة انا ما عندي طاقة بدي شي سهل، خلقي ضيق وما عندي اساسا وقت و هيك مرا بدا وقت …
يمكن بس بدا الوقت و الحب…

×واضح يا خيي انك مش خرج 🤦‍♀️
خليني قلك شي هيك مرا بدا واحد عارف شو بدو و بحاجة لحدا يحتويها و انت مش عارف شو بدك ولا قادر تحتويها…هيك مرا بدا حدا واثق بحاله و شو بده و الرجال اللي واثق بحاله عنده قوة كفاية لياخد قرار و ياخد مرا هيك اساسا ما في ياخد الا مرا قوية.
الضعيف بدو مرا ضعيفة ، القوي بقوي المرا اللي معه صدقني.
من الاخر مفهومك للعلاقة و الحب و الارتباط مختلف عن مفهومها و اكيد هل مرا مش الك…تركا بحالا و فتش ع وحدة خاضعة بتسكتا بهدية ع قولتك… لأنه كل هل مواصفات و بعدك مردد!

في شي كمان ما قلتلك اياه!
للأمانة المرا عندا ولاد و بتحبهم كتير و عم تضحي كرمالن و ولادا صراحة كتير مربايين و مهذبين بس بعدهم صغار و بحبهم ع محبتا والله …بس انا مش قد المسؤولية ولا الي خلق مع أنه هيي ما بتقبل حدا يتحمل مسؤوليتهم ابدا بس قد ما كان حسبني بالمرة… و للصراحة ما عبالي ضحي بقى و اكيد ما فيني قلها هل شي ابدا … ضحيت كتير مع نسوان قبلها طلعوا ما بيستاهلو…
خلص خلص مش ظابطة مع انها بعيني و خسارة صراحة بس ياما خسرنا …الفرص كتير بكرا الا ما لاقي شي مركب ع مزاجي..

×للامانة صرت عم بتفتش ع سبب لتهرب منها !
طب من الاول عارف عندا ولاد و منك قدا ليش تقرب من هيك نوع نسوان …حرام كرمالك و كرمالا و كرمال ولادا… ع فكرة يمكن ولادا يطلع فيهن خير الك اكتر من اي حدا تاني بحياتك ، و يمكن بحسنة رأفتك فيهن ربنا يسعدك أضعاف و يمكن ما يعيشو معكن!
هيك مرا عندا قيمة للوقت ، المرا الام غير المرا ال سنغل…
المرا الام مفهوما للحياة و الوقت و المسؤولية مختلف، و اساسا مفهوما للزواج و الطلاق مختلف، المرا الام و المنفصلة و المستقلة و الشبعانة و القوية ما بقى بدا علاقة فاشلة من هيك اذا فكرت ترتبط فيك يعني بيتك بالقلعة لأنه عم بتفتش تعمّر بيت مش عم تفتش ع atm machine …
للصراحة اوقات ربنا بيعطينا فرص منلبط فيها و بعدين مع الوقت و تجربة تانية منعرف قيمة شو خسرنا… و انشالله ربنا بيعطيك شو بتتمنى و بيعطيها هيي كمان شو بتستاهل، لأنه هيك مرا يمكن امنياتها ع قدا بس ناسية انها بتستاهل اكتر…

⛔️هل حوار بدور براسي عطول ، لانه مرقت بكذا شي فيه, و مع كذا شخص و عدة مرات، و جمعتهم كلهم وحبيت وصل منه رسالة لكل امرأة قوية عن حق او إم سنغل او مضحية:
خليكي قوية و مكتفية و تذكري انه اقدارنا مكتوبة و ما حدا بياخد شي من درب حدا …الناس بحياتنا دروس و تجارب…
و نصيبك ح يصيبك، ولادك استثمارك الوحيد بهل دني و الام اللي ما فيها خير لولادا ما فيها خير ل رجال …
كل حدا فينا اله حق بفرصة تانية بس مع ناس صح ، ضريبة النجاح و الطلاق صعبة بمجتمع عربي مادي متهور…
مفهوم البيت و العيلة و الزوجة و الستر و الزواج و الولاد تغير
ما تتخلي عن مبادئك و أولوياتك كرمال فرصة تانية متسرعة..
في كتير ذكور و ولاد حوليكي مش رجال، اعرفي تفرقي بيناتن…
اللي بريدك و بحبك ما ب جزءك ابدا بالعكس بيتقبلك و بكبرك و بيدعمك … الزواج رزق متل ما الرجال الحنون رزق و متل ما المرا الحنونة رزق و ما حدا بيعرف وين رزقك… ما تشحدي عاطفة و علاقات عابرة فاشلة… خليكي قوية عن حق و تذكري انه مفهوم القوة بمجتمعنا مئذي لأنه الرجال قلّو و المرا القوية بتشكل خطر ، بدن اياها مكسورة ليسترجلو عليها…مع العلم انه المرا القوية عن حق سند و رزق و نعمة للرجال و لولادا و أهلها…
عزة النفس و الكرامة و العين الشبعانة ما بتتمّن بهل وقت و خليكي مكمشة بصفاتك و لو انه بكلفوكي خساير كتيرة بس بتربحي فيهم نفسك و بتقوي أكتر صدقيني…
ع فكرة الحياة للمرا الضعيفة و المادية و السهلة أسهل بكتير ، مسؤولياتها و حملها بصيرو أخف، و بتعوّد الرجال يكون مسؤول…
أقوى حدا هوي اللي ما بدو شي من حدا و اللي ما بيبني سعادته
ع حساب غيره، دايما إدعي: اللهم لا تحملنا ما لا طاقة لنا به🥰